या कारणामुळे शरद पवार ब्रीच कॅंडी रूग्णालयात दाखल

टीम लय भारी

मुंबई :- राष्ट्रवादी कॉंग्रेसचे अध्यक्ष शरद पवार यांना काल रात्री ब्रीच कॅंडी रुग्णालयात दाखल केले आहे. अचानक त्यांच्या पोटात दुखू लागल्यामुळे त्यांना रूग्णालयात दाखल केले आहे. त्यांना पित्ताशयाचा त्रास असल्याचे निदान करण्यात आले असून त्यांची प्रकृत्ती स्थिर असल्याचे राष्ट्रवादीचे प्रवक्ते नवाब मलिक यांनी सांगितले.

राष्ट्रवादीचे प्रवक्ते नवाब मलिक यांनी ट्विट करून शरद पवार यांच्या प्रकृतीची माहिती दिली. काल रात्री पवार यांना अस्वस्थ वाटू लागल्याने तपासणीसाठी त्यांना ब्रीच कँडी रुग्णालयात दाखल करण्यात आले होते. तपासणीनंतर त्यांना पित्ताशयाचा त्रास असल्याचे निदान झाले. त्यामुळे पवार यांना ३१ मार्चला रुग्णालयात अॅडमिट करण्यात येणार आहे. तसेच, शरद पवारांवर एण्डोस्कोपी आणि शस्त्रक्रिया केली जाईल, असे नवाब मलिक यांनी म्हटले आहे.

सर्व कार्यक्रम रद्द

पवार हे सध्या सुरु असलेल्या पाच राज्यांच्या निवडणुकांमध्ये प्रचारसभा घेणार होते. पश्चिम बंगाल आणि केरळमध्ये त्यांचे प्रचार दौरे नियोजित होते. परंतु आता त्यांना रुग्णालयात दाखल करण्यात येत असल्याने, पुढील सर्व कार्यक्रम रद्द करण्यात आले आहेत.

 मलिक नेमकं काय म्हणाले?

आमचे अध्यक्ष शरद पवार साहेबांना थोडे अस्वस्थ वाटत होते. काल संध्याकाळी त्यांच्या पोटात दुखू लागल्यामुळे त्यांना तपासणीसाठी ब्रीच कॅण्डी रुग्णालयात दाखल करण्यात आले. तिथे तपासण्या झाल्यानंतर त्यांना पित्ताशयाचा त्रास असल्याचे निदान झाले.

शरद पवारांना हा त्रास झाल्यामुळे त्यांना देण्यात येत असलेली रक्त पातळ करण्याची औषधे थांबवण्यात आली आहेत. त्यांना  ३१ मार्च २०२१  रोजी रुग्णालयात अॅडमिट करण्यात येणार आहे. तिथे त्यांची एण्डोस्कोपी आणि शस्त्रक्रिया करण्यात येईल. त्यामुळे पुढील नोटीसपर्यंत त्यांचे सर्व कार्यक्रम रद्द करण्यात आले आहेत.

 पवारांची प्रकृती स्थिर

राष्ट्रवादीच्या नेत्या विद्या चव्हाण यांनी पवारांची प्रकृती स्थिर असल्याचे सांगितले. पवारांना नेमके काय झाले हे मला ही माहीत नाही. मलिक यांचे ट्विट वाचल्यानंतर मला कळाले असून मी पवार कुटुंबीयांना संपर्क साधण्याचा प्रयत्न करत आहे, असे त्या म्हणाल्या.