तळोजा जेलमधील २९१ कैद्यांना ‘या’ विद्यालयात हलवले!

टीम लय भारी

नवी मुंबई : करोनाच्या पार्श्वभूमीवर तळोजा कारागृहातील कैदांमध्ये फिजीकल डिस्टंसिंगमुळे कैदांना हलवण्याचा मुद्दा ऐरणीवर आला होता. त्यामुळे कारागृह विभाग आणि रायगड जिल्हाधिकाऱ्यांनी २९१ कैद्यांना सध्या खारघरमधील गोखले विद्यालयात ठेवण्याचा निर्णय घेतला आहे. विद्यालयात तात्पुरता तुरुंग उभारण्यात आला आहे.

 तळोजा कारागृहाची कैदी ठेवण्याची क्षमता २१२६ आहे. कारागृहात संसर्गाच्या भीतीने क्षमतेपेक्षा अधिक कैद्यांची व्यवस्था करण्याविषयी विचार सुरू होता. मात्र त्यांना ठेवायचे कुठे हा प्रश्न कारागृह व्यवस्थापनाला सतावत होता. यासंदर्भात रायगड जिल्हाधिकारी निधी चौधरी आणि कारागृह अधीक्षक कौस्तुभ कुरलेकर  यांच्यात चर्चा होऊन खारघर वसाहतीतील गोखले विद्यालय निवडण्यात आले. सध्या खारघर वसाहतीच्या मध्यवर्ती असणाऱ्या गोखले विद्यालयात २९१ कैदी आहेत. या तात्पुरत्या कारागृहाची सुरक्षा सध्या २२ कर्मचारी व तीन अधिकाऱ्यांवर आहे. अशी माहिती तळोजा मध्यवर्ती कारागृहाचे अधीक्षक कौस्तुभ कुरलेकर यांनी दिली.