दहावी-बारावीचे अंतिम वेळापत्रक अधिकृत वेबसाइटवर जाहीर

टीम लय भारी

मुंबई :-  दहावी-बारावीच्या लेखी आणि प्रात्यक्षिक परीक्षांचे अंतिम वेळापत्रक अधिकृत वेबसाइटवर जाहीर झाले आहे त्यांच सोबत मार्गदर्शक सूचना देखील जाहीर करण्यात आल्या आहेत. त्यानुसार लेखी परीक्षेसाठी वाढीव वेळ, लेखी परीक्षेनंतर प्रात्यक्षिक कार्य, परीक्षेला मुकलेल्या विद्यार्थ्यांसाठी विशेष परीक्षा, परीक्षा देताना घ्यावयाची दक्षता आदी महत्त्वाचे बदल करण्यात आले असल्याचे राज्य मंडळाचे सचिव डॉ. अशोक भोसले यांनी स्पष्ट केले आहे.

इयत्ता दहावीची लेखी परीक्षा २९ एप्रिल ते २० मे; तर बारावीची परीक्षा २३ एप्रिल ते २१ मे दरम्यान ऑफलाइन पद्धतीने शाळेच्या परीक्षा केंद्रावर होणार आहे. इयत्ता बारावीची प्रात्यक्षिक परीक्षा २२ मे ते १० जून या कालावधीत होणार आहे. या दहावी-बारावीच्या परीक्षेची सविस्तर अंतिम वेळापत्रके मंडळाच्या वेबसाइटवर २१ मार्चपासून उपलब्ध करून देण्यात आलेली आहेत. शैक्षणिक वर्ष २०२०-२१ मध्ये कोरोना प्रादुर्भावाच्या पार्श्वभूमीवर लेखी परीक्षेतील पेपरची वेळ ७० ते १०० गुणांच्या पेपरसाठी ३० मिनिटे; तर ४० ते ६० गुणांच्या पेपरसाठी १५ मिनिटे वाढविण्यात आली आहे. यंदा दहावीची विज्ञान विषयाची प्रात्यक्षिक परीक्षा मंडळाच्या प्रचलित पद्धतीने घेतली जाणार नाही. त्याऐवजी प्रात्यक्षिकांवर आधारित विशिष्ट लेखनकार्य प्रकल्प, प्रात्यक्षिक वही आणि गृहपाठ यांचा समावेश असेल. प्रात्यक्षिकांवर आधारित कार्य लेखी परीक्षेनंतर दिनांक २१ मे ते १० जून या कालावधीत द्यावे लागणार आहे. अधिक आणि सविस्तर माहिती https://mahahsscboard.in/ या वेबसाइटवर पाहता येतील.

प्रात्यक्षिकसाठी वाढीव कालावधी

प्रात्यक्षिक वही जमा करण्याच्या कालावधीमध्ये विद्यार्थ्यास कोरोनाची लागण झाली असल्यास अथवा त्रास होत असल्यास प्रात्यक्षिक वही जमा करण्यास १५ दिवसापर्यंत मुदतवाढ मिळेल. श्रेणी, तोंडी आणि इतर अंतर्गत मूल्यमापन इत्यादी परीक्षा घेण्याचे स्वातंत्र्य संबंधित माध्यमिक शाळांना देण्यात येत आहे. यासाठी अंतर्गत आणि बहिस्थ परीक्षक संबंधित माध्यमिक शाळांतूनच देण्यात येतील. दहावीच्या दिव्यांग विद्यार्थ्यांसाठी कार्यशिक्षण/शरीरशास्त्र, आरोग्यशास्त्र आणि गृहशास्त्र विषयाच्या लेखी आणि प्रात्यक्षिक परीक्षा दिनांक २१ मे ते ०१ जून या कालावधीत होतील. कोरोना विषाणूच्या पार्श्वभूमीवर या कालावधीत प्रात्यक्षिक परीक्षा देऊ न शकलेल्या विद्यार्थ्यांसाठी हा कालावधी दिनांक १० जूनपर्यंत वाढविण्यात येईल. दिव्यांगासाठी प्रात्यक्षिक परीक्षेऐवजी प्रात्यक्षिकांवर आधारित विशेष लेखनकार्याद्वारे मूल्यमापन करण्यात येईल. याबाबत संबंधित शाळेला स्वातंत्र्य देण्यात आल्याचे डॉ. भोसले यांनी सांगितले.