आदित्य ठाकरेंनी गुपित केले उघड; म्हणाले, माझी उमेदवारी बाबर यांच्यामुळे

लय भारी न्यूज नेटवर्क

विटा : मी निवडणूक लढवावी अशी पहिली इच्छा विटयातून आमदार अनिल बाबर यांनी व्यक्त केली होती. त्यामुळे आपण या ठिकाणी आमदार बाबर यांच्यासाठी नाही तर स्वत:च्या प्रचारासाठी आलो आहोत. आमदार अनिल बाबर यांना मत म्हणजेच मला मत.  आजची सभा ही प्रचाराची सभा नसून आमदार बाबर यांची विजयी सभा आहे. निवडणुकीनंतर तीन महिन्यात टेंभू योजनेतून वंचित गावांना पाणी देणार आहे. मुख्यमंत्री अथवा आमदार अशी पदे मिळविण्यापेक्षा मला नवा महाराष्ट्र घडवायचा आहे, असे प्रतिपादन युवा सेना प्रमुख आदित्य ठाकरे यांनी विटा येथे केले.

विटा येथे महायुतीचे उमेदवार आमदार अनिल बाबर यांच्या प्रचारार्थ आयोजित जाहीर सभेत ते बोलत होते. यावेळी खासदार संजयकाका पाटील, माजी आमदार राजेंद्रआण्णा देशमुख, जिल्हा परिषद अध्यक्ष संग्रामसिंह देशमुख, समाजकल्याण सभापती ब्रम्हानंद पडळकर, आटपाडीचे नेते तानाजीराव पाटील, आटपाडीचे सभापती हर्षवर्धन देशमुख, काँग्रेसचे तालुकाध्यक्ष रविंद्र देशमुख, जिल्हा बँकचे माजी अध्यक्ष दिनकर पाटील, जिल्हा परिषद उपाध्यक्ष सुहास बाबर, नगरसेवक अमोल बाबर, माजी जि.प. सदस्य सुहासनाना शिंदे, भाजपा नेते सुहास पाटील, माजी नगरसेवक अनिल म. बाबर, आण्णासाहेब पत्की यांची प्रमुख उपस्थिती होती.

आदित्य  ठाकरे म्हणाले, काँग्रेस आणि राष्ट्रवादीच्या काळात महाराष्ट्र रसातळाला गेला आहे. गेली पाच वर्षे आमची सत्ता यांनी केलेला चुकीचा कारभार निस्तरण्यात गेली आहे. आता आपणाला नवा महाराष्ट्र घडवायचा आहे. मागील खेपेस मी आमदार बाबर यांच्या प्रचारासाठी आलो होतो. त्यावेळी त्यांनी निवडणूकीत उभे रहा अशी इच्छा व्यक्त केली होती. वय बसत नसल्याने मी त्यावेळी उभा राहू शकलो नाही. पण यावेळी उभा रहाण्याचा निर्णय घेतला. त्यावेळी कसल्याही परस्थितीत विटयात येवून आशिर्वाद घ्यायचा असा मी निश्‍चिय केला होता, असे आदित्य म्हणाले.