धनगर समाजाचा प्रभाकर देशमुख यांना पाठींबा

लय भारी न्यूज नेटवर्क

म्हसवड : माण – खटाव विधानसभा मतदारसंघातील अपक्ष उमेदवार प्रभाकर देशमुख यांना जाहीर पाठींबा देण्याची भूमिका माण – खटावमधील धनगर समाजाने घेतली आहे. माण – खटाव मतदारसंघात धनगर समाजाचे जवळपास 80 हजार मतदान आहे. धनगर समाजाची मोठी व्होट बँक प्रभाकर देशमुख यांच्या पाठीमागे उभी राहिल्याने माण – खटावमधील निवडणुकीचे चित्र मोठ्या प्रमाणात बदलेल असे बोलले जात आहे.

प्रभाकर देशमुख यांच्याविषयी विरोधकांनी अपप्रचार सुरू केला होता. देशमुख यांना केवळ मराठा समाजाचाच पाठींबा असल्याचा अपप्रचार सुरू होता. परंतु धनगर समाजाने जाहीर पाठिंबा देण्याची भूमिका घेतली आहे. त्यामुळे विरोधकांच्या आरोपातील हवा निघेल, अशी भावना धनगर समाजातील नेत्यांनी व्यक्त केली आहे.

धनगर समाजाबरोबरच वंजारी, दलित, माळी, रामोशी, कैकाडी अशा अठरापगड जातीच्या नेत्यांसोबत देशमुख यांनी संवाद साधला आहे. एवढेच नव्हे तर या समाजाचा विकास व्हावा. त्यांच्या पुढच्या पिढीची प्रगती व्हावी. त्यांची पारंपरिक व्यावसायवृद्धी व्हावी यासाठी आपण लक्ष घालणार असल्याचे देशमुख यांनी यापूर्वीच जाहीर केले आहे.

म्हसवड येथे आज होत असलेल्या धनगर समाजाच्या मेळाव्यामध्ये प्रभाकर देशमुख यांच्यासह प्रभाकर घार्गे, दिलीप येळगावकर, अनिल देसाई आदी मान्यवर उपस्थित राहणार आहेत.

धनगर समाजातील प्रश्न, त्यांच्या मागण्या, धनगर समाजाची संस्कृती याचा विकास करण्याबाबत आजच्या मेळाव्यामध्ये चर्चा होईल, असे सूत्रांनी सांगितले.

प्रभाकर देशमुख यांना धनगर समाजातील 50 पेक्षा जास्त नेत्यांनी पाठींबा दर्शविला आहे. यांत बबन विरकर, मामूशेठ विरकर, युवराज बनगर, अशोक माने, विक्रम शिंगाडे, जालिंदर खरात, नानासाहेब दोलतडे, बाळासाहेब काळे, दादासाहेब शिंगाडे, देविदास म्हासाळ, दादा मडके, सचिन व्हनमाने, बाबाराजे हुलगे, दादासाहेब दोरगे, मारूती मोठे, विराज गोरड, भास्कर काळे, सुभाष घुटुगडे, अंकुश गारळे, बाळासाहेब मदने, महादेव म्हासाळ, रामचंद्र झिमल, संजय दिडवाघ, बाबासाहेब माने, बापू बनगर, भारत अनुसे आदी नेत्यांचा समावेश आहे.

धनगर समाजातील विविध मान्यवर नेत्यांनी त्या अनुषंगाने आज सायंकाळी म्हसवड येथे धनगर समाजाच्या मेळाव्याचे आयोजनही केले आहे.

भाजप – शिवसेना धनगरांसाठी घातक

धनगरांना आरक्षण देतो म्हणून भाजपने मते घेतली. पण आरक्षण दिलेच नाही. दुसऱ्या बाजूला भाजपने अण्णा डांगे, अनिल गोेटे, प्रकाश शेंडगे, महादेव जानकर या धनगर नेत्यांना संपविले. रमेश शेंडगे, गणेश हाके अशा नेत्यांना खड्यासारखे बाजूला ठेवले आहे. शिवसेनेने तर विद्यमान धनगर आमदार नारायण पाटील यांना तिकिटच दिले नाही. त्यामुळे भाजप व शिवसेना या दोन्ही पक्षांविरोधात धनगर समाजात रोष पसरला असल्याचे सूत्रांनी सांगितले.