ठाकरे सरकारची आज अग्निपरीक्षा

लय भारी न्यूज नेटवर्क

मुंबई : महाराष्ट्र विकास आघाडी सरकारला आज विधानसभेत अग्निपरीक्षेला सामोरं जावं लागणार आहे. आज (शनिवार) दुपारी २ वाजता विधानसभेत उद्धव ठाकरे यांच्या सरकारला आपलं बहुमत सिद्ध करावं लागणार आहे.

विधानसभा अध्यक्षांची निवड, विरोधी पक्ष नेत्याची घोषणा आणि राज्यपालांचं अभिभाषण यासाठी विधानसभेचं दोन दिवसांचं विशेष अधिवेशन बोलवण्यात आलं आहे. यासाठी महाराष्ट्र विकास आघाडी सरकार सज्ज असून, आम्हाल कोणतीही चिंता नाही. अशी माहिती महाराष्ट्र विकास आघाडीच्या नेत्यांनी वारंवार माध्यमांशी बोलताना सांगितले.

महाराष्ट्र विकास आघाडी सरकारकडे शिवसेना ५६, राष्ट्रवादी काँग्रेस ५४ आणि काँग्रेसचे ४४ आमदार आहेत. त्यामुळे या तीनही पक्षांच्या आमदारांची एकूण संख्या १५४ एवढी आहे. याशिवाय अनेक अपक्ष आणि काही छोट्या पक्षांनी देखील आपला पाठिंबा या सरकारला देऊ केली आहे. त्यामुळे हा आकडा १६२ च्या देखील पुढे जाऊ शकतो. त्यामुळे १४५ हा बहुमताचा आकडा हे सरकार नक्कीच गाठेल अशी सर्वांना आशा आहे. दरम्यान, आज बहुमत सिद्ध झाल्यानंतर उद्या (रविवार) विधानसभा अध्यक्ष पदासाठी निवडणूक होईल. तसंच विरोधी पक्ष नेत्याची देखील घोषणा केली जाईल. याशिवाय उद्याच राज्यपालांचं अभिभाषण देखील होईल.

महाराष्ट्र विधानसभेचे हंगामी अध्यक्ष कालिदास कोळंबकर यांना शुक्रवारी हटवून राष्ट्रवादी काँग्रेसचे आमदार दिलीप वळसे-पाटील यांची हंगामी अध्यक्ष म्हणून निवड करण्यात आली. आता नव्या अध्यक्षांसमोरच हे सरकार आपलं बहुमत सिद्ध करणार आहे. याकडे सर्वांच्या नजरा लागलेल्या आहेत.