‘फडणवीसांच्या नशिबात काय लिहिलंय, हे सटवीलाच माहित’

लय भारी न्यूज नेटवर्क

मुंबई : पाच वर्षे पूर्ण काळ मुख्यमंत्री. त्यानंतर सर्वात कमी कालावधीसाठी मुख्यमंत्री. मुख्यमंत्री झाल्यानंतर आता विरोधी पक्षनेते… देवेंद्र फडणवीस यांच्या नशिबात काय लिहून ठेवलंय हे सटवीलाच माहित अशा भावना भाजपचे आमदार आशिष शेलार यांनी आज विधानसभेत व्यक्त केल्या.

देवेंद्र फडणवीस यांची आज विधानसभेचे विरोधी पक्षनेते म्हणून निवड झाली. त्यानंतर मांडण्यात आलेल्या अभिनंदनाच्या ठरावावर शेलार बोलत होते.

शेलार पुढे म्हणाले की, शनिवारी हंगामी विधानसभाध्यक्ष दिलीप वळसे पाटील यांनी टाकलेला सवाल सहज टोलावण्यासारखा नव्हता. पण त्यावर धाडसाने व तत्पर उत्तर देणारे फडणवीस आज विरोधी पक्षनेतेपदी आलेले आहेत. या सदनात कायद्याचा सिद्धांत मांडणारा सभासद म्हणून फडणवीस यांची ओळख आहे. संघ स्वयंसेवक म्हणून मिळेल ते काम करण्याची त्यांची भावना आहे. मनात दुःख नाही. क्लेष नाही. वेदना नाही. एक स्वयंसेवक पुन्हा विरोधी पक्षनेता होतोय, त्याचा आम्हाला आनंद आहे. फडणवीस हे रात्रीलाही पहारा देणारे नेते आहेत. चुकीचे घडले तर तिथे जागता पहारा ठेवणारा हा नेता आहे. त्यांच्यावर काहींनी जातींचे वार केले. घेतलेल्या निर्णयांचे वार केले. दुसऱ्यांनी घेतलेल्या निर्णयांचे वार केले. पण ते डगमगले नाहीत. आता फडणवीस विरोधी पक्षनेते आहेत. सरकारला एकही निर्णय चुकीचा घेऊ देणार नाहीत, असाही विश्वास शेलार यांनी यावेळी व्यक्त केला.

विधानसभेच्या अध्यक्षपदी नाना पटोले यांची नियुक्ती

विधानसभेच्या अध्यक्षपदी आज नाना पटोले यांची बिनविरोध निवड करण्यात आली. भाजपचे उमेदवार किसन कथोरे यांनी आपला अर्ज मागे घेतल्यामुळे पटोले यांची बिनविरोध निवड होऊ शकली.