…आता एसआरएच्या झोपडपट्टी धारकांसाठी दवाखाने उभारणार! – जितेंद्र आव्हाड

टीम लय भारी

मुंबई : महाराष्ट्र विकास आघाडी सरकारने महत्वपूर्ण निर्णय घेतला आहे. कोरोनामुळे आरोग्य विभागाकडे लक्ष देण्याची गरज जाणवू लागली आहे. या पार्श्वभूमीवर गृहनिर्माण मंत्री राष्ट्रवादीचे नेते जितेंद्र आव्हाड यांनी एक मोठा निर्णय घेतला आहे. यापुढे एसआरएच्या प्रत्येक प्रकल्पामध्ये झोपडपट्टी धारकांच्या प्रकृतीची काळजी म्हणून प्रथामिक आरोग्य केंद्र उभारण्यात येणार आहे. जितेंद्र आव्हाड यांनी तसे आदेश दिले आहेत. ट्विटरच्या माध्यमातून त्यांनी ही माहिती दिली आहे.

जितेंद्र आव्हाड यांनी सांगितलं आहे की, “यापुढे एसआरएच्या प्रत्येक प्रकल्पामध्ये झोपडपट्टी धारकांच्या प्रकृतीची काळजी म्हणून १००० ते ५००० स्क्वेअर फूटांचं प्रथामिक आरोग्य केंद्र (मोफत एफएसआयच्या धर्तीवर) बांधण्याचा निर्णय एसआरएने घेतला आहे. तसे आदेश मी पारित केले आहेत”.

महाराष्ट्रात आत्तापर्यंत ४६ हजार ७८ रुग्ण बरे होऊन घरी गेले आहेत. तर करोना रुग्णांची आत्तापर्यंतची एकूण संख्या ९७ हजार ६४८ झाली आहे. गुरुवारी ३६०७ रुग्ण आढळणं ही आत्तापर्यंतची सर्वात मोठी संख्या आहे.