शिवसेनेच्या पहिल्या यादीत आदित्य ठाकरे, प्रदीप शर्मांचा समावेश

मुंबई :  भारतीय जनता पक्षाच्या उमेदवारांची पहिली यादी जाहीर होताच शिवसेनेनेही आपली यादी घोषित केली आहे. अपेक्षेप्रमाणे यादीमध्ये आदित्य ठाकरे यांचा समावेश आहे. निवृत्त पोलीस अधिकारी प्रदी शर्मा यांनाही पहिल्या यादीत स्थान मिळाले आहे. यादीमध्ये एकूण 70 उमेदवारांचा समावेश आहे.

आयारामांना संधी

काँग्रेस व राष्ट्रवादीमधून शिवसेनेत आलेल्या विविध नेत्यांनाही शिवसेनेने आपल्या पहिल्या यादीत संधी दिली आहे. यांत भास्कर जाधव, पांडूरंग बरोरा, गौतम चाबुकस्वार, अब्दुल सत्तार निर्मला गावीत, संग्राम कुपेकर, सुरेश गोरे, विठ्ठल लोकरे यांचा समावेश आहे. काही महिन्यांपूर्वी जयदत्त क्षीरसागर राष्ट्रवादीमधून शिवसेनेत आले होते. त्यावेळी त्यांना लगेचच मंत्रीपद देण्यात आले होते. आता त्यांना अपेक्षेनुसार उमेदवारी देण्यात आली आहे.

श्रद्धा जाधव यांची निराशा

वडाळ्यामधून उमेदवारी मिळावी म्हणून श्रद्धा जाधव यांनी लॉबिंग केली होती. पण महायुतीमध्ये हा मतदारसंघ भाजपला देण्यात आला आहे. भाजपने त्यांच्या यादीत कालिदास कोळंबकरांचे नाव जाहीर केले आहे. वांद्रे मतदारसंघातून मुंबईचे महापौर विश्वनाथ महाडेश्वर यांच्या नावाची चर्चा आहे. पण या मतदारसंघातील नाव गुलदस्त्यात ठेवण्यात आले आहे.