सुशांत प्रकरणाचा  तपास डॉ. दाभोलकर हत्या प्रमाणे होऊ नये : शरद पवार

टीम लय भारी

मुंबई : अंधश्रद्धा निर्मूलन समितीचे सर्वेसर्वा डॉ. नरेंद्र दाभोलकर यांच्या हत्येला आजच (20 ऑगस्ट) सात वर्ष पूर्ण झाली.  या हत्येचा तपास सीबीआयकडे असूनही तो पूर्ण झालेला नाही. बुधवारी सुप्रीम कोर्टाच्या निर्णयानंतर अभिनेता सुशांत सिंह राजपूत आत्महत्या प्रकरणाचा तपास देण्यात आला. या निर्णयानंतर राष्ट्रवादीचे अध्यक्ष शरद पवार यांनी प्रतिक्रिया दिली आहे. डॉ. नरेंद्र दाभोलकर यांच्या हत्येच्या तपासकार्याप्रमाणे याची परिणती होणार नाही, अशी आशा शरद पवार यांनी ट्विटरवरुन  व्यक्त केली. (Sharad Pawar reaction on Sushant Singh Rajput Death Case transferred to CBI)

सुशांत आत्महत्या प्रकरणातील आतापर्यंत गोळा केलेले पुरावे सीबीआयकडे सोपवण्याचे आदेश सर्वोच्च न्यायालयाने बुधवारी मुंबई पोलिसांना दिले आहेत. “सर्वोच्च न्यायालयाने सुशांतसिंह राजपूत प्रकरणातील तपास सीबीआयच्या स्वाधीन करण्याचा आदेश दिला आहे. मला खात्री आहे की महाराष्ट्र सरकार या निर्णयाचा आदर करुन चौकशी प्रक्रियेत पूर्ण सहकार्य करेल” असा विश्वास शरद पवार यांनी ट्विटरवरुन व्यक्त केला आहे.  “मला आशा आहे की, डॉ. नरेंद्र दाभोलकर यांच्या हत्येप्रकरणी सीबीआयमार्फत 2014 मध्ये सुरु झालेल्या आणि अद्याप निराकरण होऊ न शकलेल्या चौकशी प्रक्रियेप्रमाणे या तपासकार्याची परिणती होणार नाही.” अशी आशाही पवारांनी व्यक्त केली.

सीबीआय तपासाबाबत पवारांची भूमिका…

“मी महाराष्ट्र पोलीस आणि मुंबई पोलीस यांना 50 वर्ष ओळखतो. माझा पूर्ण विश्वास आहे. चौकशी करायची असेल, सीबीआय किंवा कोणतीही एजन्सी वापरायची असेल, तर मी विरोध करणार नाही.” अशी भूमिका शरद पवार यांनी मांडली होती.