संतापजनक: दागिन्यांच्या हव्यासापोटी वृद्धेची मातीत तोंड दाबून हत्या

मंचर येथील पांढरीमळा वस्तीत एका वृद्धेच्या अंगावरील दागिने लुटून तोंड मातीत दाबून खून केल्याची खळबळजनक घटना घडली आहे. अंजनाबाई प्रभाकर बाणखेले (वय 78) असे खून झालेल्या वृद्धेचे नाव आहे. पोलिस पथकाने शोध घेतला असता, घरापासून 300 मीटर अंतरावर असलेल्या शेतामधील गवतात वृद्धेचा मृतदेह आढळून आला. मृत वृद्धेच्या गळ्यातील सोन्याचे मंगळसूत्र, कानातील वेल चोरून नेण्यात आले होते. त्यामुळे दागिन्यांच्या हव्यासापोटी मातीत तोंड दाबून वृद्ध महिलेचा खून करण्यात आल्याची धक्कादायक बाब उघडकिस आली. सदर प्रकारानंतर परिसरातून संताप व्यक्त करण्यात येत आहे.

पांढरीमळा मंचर येथे अंजनाबाई प्रभाकर बाणखेले या घरी एकट्याच राहतात. त्यांना तीन मुले व तीन मुली असून, मुले कामानिमित्त मुंबई येथे राहतात. एक परिचयाचा कामगार बाणखेले यांना नेहमीच मदत करण्यासाठी घरी येत असे. बाणखेले यांच्या अंगावर सोन्याचे दागिने होते. त्याच्यावर या कामगाराची नजर होती. सोमवारी दुपारी दोन वाजता अंजनाबाई बाणखेले या घरातून निघून गेल्या. मुंबईतून मुलाने फोन केला. मात्र, तो बंद लागल्याने, त्यांनी शेजाऱ्यांना शोध घेण्यास सांगितले. रात्री उशिरापर्यंत त्यांचा शोध लागला नव्हता. त्यामुळे माजी ग्रामपंचायत सदस्य वसंतराव बाणखेले यांनी त्या हरवल्याची तक्रार मंचर पोलिसांत दिली.

येथून जवळच उजवा कालवा गेल्याने तेथेही शोध घेण्यात आला. या दरम्यान संबंधित कामगाराने उसनवारीचे पैसे देण्यासाठी एका व्यक्तीला दागिने दिले होते. ही गोष्ट समजल्यानंतर चौकशी करण्यात आली. त्या कामगाराला फोन केला असता त्याने परराज्यात असल्याचे सांगितले. उडवाउडवीची उत्तरे त्याने दिली. संशय बळावल्यानंतर कसून चौकशी केली असता, वृद्धा अंजनाबाई बाणखेले यांचा खून केल्याचे त्याने कबूल केले व घटनेची जागा सांगितली.

पोलिस पथकाने शोध घेतला असता, घरापासून 300 मीटर अंतरावर असलेल्या शेतामधील गवतात वृद्धेचा मृतदेह आढळून आला. दरम्यान रुग्णवाहिकेतून मृतदेह मंचर उपजिल्हा रुग्णालयात शवविच्छेदनासाठी आणण्यात आला. मंचर पोलिसांनी पंचनामा केला असून, परराज्यात गेलेल्या संशयित आरोपी कामगाराला परत आणण्यासाठी पोलिस पथक रवाना झाले आहे. गुन्हा दाखल करण्याचे काम रात्री उशिरापर्यंत सुरू होते.

हे सुद्धा वाचा : 

माता न तू वैरिणी: प्रियकराच्या मदतीने निर्दयी मातेने घेतला लेकराचा जीव

CID फेम अभिनेत्री चंद्रिका साहाची नवऱ्याविरोधात पोलिसांत धाव

डीजेच्या तीव्र आवाजामुळे कोमात गेलेल्या वयस्कर शिक्षकाचा मृत्यू

crime news marathi, Manchar old woman was killed by pressing her face into the soil and rob her jewelry