लॉकडाऊनमध्ये फिरणा-या तोतया आमदाराला ठोकल्या बेड्या

लय भारी टीम

मुंबई : लॉकडाऊन असतानाही गाडीला विधानसभेचं चित्रं असणारं फेक स्टिकर लावून मुलासह मुंबईभर फिरणाऱ्या तोतया आमदाराला पोलिसांनी बेड्या ठोकल्या आहे. त्याच्याविरोधात लॉकडाऊनचे नियम तोडल्याचे आणि राष्ट्रीय चिन्हांचा अवमान केल्याचे गुन्हे दाखल करण्यात आले असून पोलीस अधिक तपास करत आहेत. या घटनेमुळे एकच खळबळ उडाली आहे.

कमलेश शाह असं या आरोपीचं नाव आहे. माटुंग्याच्या माहेश्वरी सर्कल येथे वाहतूक पोलिसांची नाकाबंदी सुरू आहे. या नाकाबंदी दरम्यान पोलिसांनी या तोतया आमदाराची गाडी थांबवली. या गाडीत ५४ वर्षीय कमलेश शाह हे मुलगा तनिष शाहसोबत बसलेले होते. हे दोघेही बापलेक आमदार असल्याचं फेक स्टिकर गाडीवर लावून प्रवास करत असल्याची कुणकुण पोलिसांना लागली होती. त्यामुळे माहेश्वरी सर्कलला त्यांची गाडी येताच पोलिसांनी गाडी थांबवली. त्यानंतर या दोघांचीही चौकशी करण्यात आली. त्यानंतर गाडीवरील स्टिकरचीही तपासणी केली असता ते झेरॉक्स केलेलं स्टिकर असल्याचं आढळून आलं.

त्यानंतर पोलिसांनी या दोघांनाही पोलीस ठाण्यात घेऊन उलटतपासणी सुरू करताच दोघांनीही खोटे स्टिकर लावून फिरत असल्याचं कबूल केलं. त्यानंतर माटुंगा पोलिसांनी या दोघांविरोधात भादंविच्या कलम ४६५, ४१९,१७१.१८८,२६९ सह कलम ३,४,७ अनव्ये गुन्हे दाखल केले आहेत. तसेच कोविड१९ उपाययोजनेच्या अंतर्गतही गुन्हे दाखल करण्यात आले असून दोघांनाही अटक करण्यात आली आहे. या आधी १८ एप्रिल रोजी मरोळ येथे राहणाऱ्या मोहम्मद साबिर असलम शाह यालाही अटक करण्यात आली होती. तोही तोतया आमदार बनून मुंबईत प्रवास करत होता. लॉकडाऊनचे नियम तोडून मुंबईत प्रवास केल्याप्रकरणी आणि राष्ट्रीय चिन्हांचा अवमान केल्याप्रकरणी त्याच्याविरोधात गुन्हे दाखल करण्यात आले आहेत.