एकाच नावाच्या दोन महिला उमेदवार, राष्ट्रवादीसमोर डोकेदुखी

लय भारी न्यूज नेटवर्क : राजू थोरात

तासगाव : तासगाव कवठेमहांकाळ मतदारसंघातून आर. आर. पाटील यांच्या पत्नी सुमनताई रावसाहेब पाटील यांनी राष्ट्रवादी काँग्रेसकडून अर्ज भरला आहे. पण त्याच वेळी आज आणखी एका महिलेने आपला अर्ज सादर केला आहे. या महिलेचे नाव सुद्धा सुमनताई रावसाहेब पाटील असेच आहे.

स्वतःचे नाव, पतीचे नाव व आडनाव ही तिन्ही नावे एकसारखीच आहेत. राष्ट्रवादीच्या सुमनताई आणि अपक्ष सुमनताई या दोघींना केवळ चिन्हावरून किंवा फोटोवरूनच ओळखणे शक्य आहे. परंतु एकसारखीच नावे असल्यामुळे अनेक मतदारांचा गोंधळ उडण्याची शक्यता आहे.

अपक्ष म्हणून अर्ज दाखल केलेल्या सुमनताईंच्या मागे अन्य स्पर्धक उमेदवारांचा तर हात नाही ना ? असाही सवाल उपस्थित करण्यात येत आहे.

राष्ट्रवादीच्या सुमनताई पाटील यांना शिवसेनेच्या अजित घोरपडेंनी तगडे आव्हान उभे केले आहे. घोरपडे यांच्या पाठीमागे खासदार संजयकाका पाटील यांनी पूर्ण ताकद उभी केलेली आहे. त्यामुळे एकेका मताला महत्व राहणार आहे. अशा परिस्थितीत अपक्ष सुमनताई पाटील यांनी जर राष्ट्रवादीच्या सुमनताईंची मते खाल्ल्यास राष्ट्रवादीसमोर मोठीच डोकेदुखी होईल असे बोलले जात आहे.