Mumbai-Mandwa Water Taxi : मुंबई ते मांडवा वॉटर टॅक्सी 1 नोव्हेंबरपासून धावणार

मुंबईत गेल्या काही वर्षांपासून पाण्यातील टॅक्सी अर्थात वॉटर टॅक्सी धावणार असल्याची चर्चा सुरु होती. पण आता अखेरीस या चर्चेला पूर्णविराम लागला आहे. कारण लवकरच वॉटर टॅक्सी सुरु करण्याचा निर्णय घेण्यात आला आहे. वॉटर टॅक्सी सुरु होण्याच्या प्रतीक्षेत असलेल्या प्रवाशांना आनंदाची बातमी मिळाली आहे. तर येत्या 1 नोव्हेंबरपासून मुंबई क्रूझ टर्मिनल (Mumbai) ते मांडवा (Mandwa) अशी वॉटर टॅक्सी प्रवाशांच्या सेवेत दाखल होणार आहे. महत्वाची गोष्ट म्हणजे या मार्गावर वॉटर टॅक्सी सुरू झाल्यानंतर मुंबई ते मांडवा हा प्रवास अवघ्या 45 मिनिटांत पूर्ण करणे शक्य होणार आहे. जलमार्गाने प्रवाशांना वाहतुकीचा दुसरा पर्याय उपलब्ध व्हावा, यासाठी तत्कालीन मुख्यमंत्री उद्धव ठाकरे यांनी फेब्रुवारी 2022 मध्ये वॉटर टॅक्सी सेवा थाटात सुरु केली होती.

क्रूझ टर्मिनलच्या प्रवाशांसाठी उत्तम कनेक्टिव्हिटी सुविधा नसल्यामुळे वॉटर टॅक्सी कंपन्यांनी मुंबईतून सेवा सुरु करण्यास नकार दिला होता. सध्या बेलापूर ते जेएनपीटी, एलिफंटा दरम्यान वॉटर टॅक्सी सुरु आहे. मुंबई क्रूझ टर्मिनलवरून सेवा सुरु करण्यास परवानगी मिळाल्यानंतर जवळपास सहा महिन्यांनंतर नयनतारा शिपिंग कंपनीने मुंबई ते मांडवा दरम्यान वॉटर टॅक्सी सेवा सुरू करण्याची घोषणा केली आहे.

या प्रवासासाठी मोजावे लागणार 400 रुपये
मुंबई ते मांडवा दरम्यान जलमार्गाने प्रवास करण्यासाठी प्रवाशांना 400 रुपये मोजावे लागणार आहेत. नयनतारा शिपिंग कंपनीचे संचालक रोहित सिन्हा यांनी दिलेल्या माहितीनुसार, वॉटर टॅक्सीमधील प्रवाशांची सोय लक्षात घेऊन हे जहाज तयार करण्यात आले आहे. या जहाजातून जवळपास 200 प्रवासी एकाच वेळी प्रवास करू शकतील. जलवाहतुकीदरम्यान प्रवाशांना जहाजात एसीचीही व्यवस्था करण्यात आली आहे.

हे सुद्धा वाचा

Mumbai : कुत्र्यांना खाऊ घालण्यासंदर्भातील निर्णयाविरोधात मुंबईत प्राणीमित्र संघटनेचे आंदोलन

Mumbai-Pune Express Way Accident : मुंबई पुणे महामार्गावर भिषण अपघात! धावत्या ट्रकने घेतला पेट

MHT CET 2022 : महाराष्ट्र सीईटी राउंड 2 वेब पर्याय प्रवेश प्रक्रिया सुरू! असा करा अर्ज

गेटवे ऑफ इंडियापासून लवकरच सेवा सुरु होणार
नयनतारा शिपिंग कंपनीचे संचालक रोहित सिन्हा यांनी दिलेल्या माहितीनुसार, लवकरच गेटवे ऑफ इंडिया येथून देखील वॉटर टॅक्सी सेवा उपलब्ध होणार आहे. सध्या त्याला मांडवा दरम्यानच्या क्रुझ टर्मिनलवरून सुरु करण्याची परवानगी देण्यात आली होती. येत्या 10 ते 15 दिवसांत गेट वे ऑफ इंडिया येथून वॉटर टॅक्सी सेवा सुरु करण्यासाठी प्रशासनाकडून परवानगी मिळणार आहे. त्यानंतर बेलापूर ते एलिफंटा दरम्यान गेटवे ऑफ इंडिया येथून सुद्धा ही सेवा सुरु करण्यात येईल.

29 तारखेपासून करता येईल बुकिंग
1 नोव्हेंबर पासून सुरु होणाऱ्या या वॉटर टॅक्सीचे बुकिंग 29 ऑक्टोबरपासून सुरु होईल. रोहित सिन्हा यांनी दिलेल्या माहितीनुसार, या वॉटर टॅक्सी सेवेचा लाभ घेण्यासाठी प्रवासी 29 ऑक्टोबरपासून ऑनलाइन तिकीट काढू शकतात. सुरुवातीच्या दिवसांत मुंबई क्रूझ टर्मिनलवरून सकाळी 10.30 वाजल्यापासून टॅक्सी सेवा उपलब्ध असेल. प्रवाशांच्या प्रतिसादानुसार वेळेत बदल करण्यात येणार आहेत. तर गेटवे ऑफ इंडियाया ठिकाणाहून सेवा सुरु झाल्यावर सकाळी 8.30 ते संध्याकाळी 6.30 या वेळेत टॅक्सी उपलब्ध करून देण्याचा प्रयत्न असल्याचे देखील सांगण्यात आले आहे.