कोकण भाजपमय करणार : नीतेश राणे यांची प्रतिक्रिया

लय भारी न्यूज नेटवर्क

कणकवली : कोणताही जाहीर प्रवेशाचा सोहळा आयोजित न करता नीतेश राणे यांनी भाजपचे सदस्यत्व स्वीकारले आहे. शुक्रवारी ते आपला उमेदवार अर्ज भरणार आहेत. ‘संपूर्ण कोकण भाजपमय करणार असल्याची’ प्रतिक्रिया त्यांनी सदस्यत्व स्विकारल्यानंतर व्यक्त केली.

भाजपचे जिल्हाध्यक्ष प्रमोद जठार यांनी नीतेश राणे यांना भाजपचे सदस्यत्व दिले. विशेष म्हणजे, सन 2014 च्या निवडणुकीमध्ये जठार हे नीतेश राणे यांचे निवडणुकीतील प्रतिस्पर्धी होते. त्यावेळी जठार भाजपचे उमेदवार होते, तर नीतेश राणे काँग्रेसकडून निवडून आले होते.

राज्यमंत्री रवींद्र चव्हाण शुक्रवारी नीतेश राणे यांना एबी फॉर्म देणार आहेत. त्यानंतर जाहिररित्या अर्ज भरण्यात येईल. यावेळी खासदार नारायण राणे हे सुद्धा उपस्थित राहणार असल्याचे नीतेश यांनी सांगितले.

शिवसेनेचा विरोध असल्यामुळे राणे कुटुंबियांचा भाजप प्रवेश रखडला होता. अर्ज भरण्यास अवघे दोन दिवस उरले असताना नीतेश राणे यांना भाजपचे सदस्यत्व देण्यात आले आहे. राणे कुटुंबियांना अखेर भाजपमध्ये स्थान दिल्यामुळे शिवसेनेमध्ये नाराजी आहे. त्यामुळे भाजप – शिवसेना युती असली तरी राणे यांचे काम करणार नसल्याची भूमिका शिवसेनेने घेतली आहे. काही मतदारसंघात तर भाजप व शिवसेनेच्या स्थानिक नेत्यांनी एकमेकांविरोधात दंड थोपटले आहेत.