पंढरपूर, बालाजी तिर्थक्षेत्राप्रमाणे मुंबादेवीचाही विकास करणार : एकनाथ शिंदे

काशी विश्वनाथ मंदिराच्या धर्तीवर पंढरपूर, बालाजी तिर्थक्षेत्राप्रमाणे मुंबादेवी मंदिर परिसराचाही पुनर्विकास करण्याची घोषणा मुख्यमंत्री एकनाथ शिंदे यांनी गुरुवारी केली. त्यासाठी मुंबादेवी मंदिर विकास प्राधिकरणाची स्थापना करण्याबाबत शासन सकारात्मक निर्णय घेईल, असे मुख्यमंत्र्यांनी सांगितले.

मुंबादेवी प्राचीन मंदिर असून, याप्रती सर्वांनाच श्रद्धा, आस्था आणि प्रेम आहे. मुंबादेवी मंदिर आणि परिसरात मोठ्या संख्येने भक्त येत असतात. श्री. काशी विश्वनाथ मंदिर व उज्जैन येथील श्री महाकालेश्वर मंदिर कॉरिडॉर तसेच तिरूपती देवस्थानाच्या धर्तीवर मुंबादेवी परिसराचा विकास करण्यात यावा, अशी मागणी होत आहे. त्या पार्श्वभूमीवर मुख्यमंत्र्यांनी या परिसराची पाहणी केली. तसेच या परिसरात अत्यावश्यक असणाऱ्या सोयी-सुविधा लक्षात घेऊन दर्शन रांगा, वाहनतळ आणि इतर आवश्यक असणाऱ्या सुविधांच्या विकासाबाबत शासन सर्वतोपरी प्रयत्न करेल, असे मुख्यमंत्र्यांनी सांगितले.

मुंबईतील काळबादेवी येथील मुंबादेवीचे दर्शन घेऊन मुख्यमंत्र्यांनी या परिसराची पाहणी केली. यावेळी विधानसभा अध्यक्ष ॲड. राहुल नार्वेकर, महिला व बालविकास मंत्री मंगलप्रभात लोढा, आमदार सदा सरवणकर, माजी मंत्री डॉ. दीपक सावंत, माजी मंत्री राज के. पुरोहित व माजी नगरसेवक आकाश पुरोहित, अतिरिक्त महापालिका आयुक्त पी. वेलारासू आदी उपस्थित होते.

हे सुद्धा वाचा : 

नामवंत मराठी कलाकारांचा शिंदेंच्या शिवसेनेत जाहीर प्रवेश!

सावरकर गौरव यात्रा अन् राहुल गांधींचा निषेध – एकनाथ शिंदे, देवेंद्र फडणवीस

मुख्यमंत्री शिंदे डॉक्टर झाले याचा आनंद झाला पण…; राऊतांचे चिमटे