साहेबांना हा निर्णय कधी ना कधी घ्यावाच लागणार होता..! अजित पवारांनी काढली कार्यकर्त्यांची समजूत

शरद पवार यांनी राष्टवादी कॉंग्रेसचे अध्यक्षपद सोडण्याचा निर्णय जाहीर केल्यानंतर पक्षातील नेते आणि कार्यकर्त्यांच्या भावना अनावर होऊन प्रदेशाध्यक्ष जयंत पाटील, धनंजय मुंडे, जितेंद्र आव्हाड या नेत्यांना अश्रूही रोखता आले नसतानाच  अजित पवार यांनी मात्र कार्यकर्त्यांच्या भावनांना आवर घालून वयामुळे शरद पवार साहेबांना हा निर्णय कधी ना कधी घ्यावाच लागणार असल्याचे  सांगितले. ते कालच हा निर्णय जाहीर करणार होते, मात्र मविआच्या वज्रमूठ सभेमुळे त्यांनी हा निर्णय पुढे ढकलला होता.

शरद पवार यांनी निवृत्तीची घोषणा करताच कार्यकर्त्यांनी घोषणाबाजी करीत सभागृहात गोंधळ घातला. साहेब, तुम्ही निवृत्त होऊ नका, अशी विनंती करीत पक्षातील प्रमुख नेते आणि कार्यकर्त्यांनी रडत-रडत समजावण्याचा प्रयत्न केला.