टीम लय भारी
मुंबई : धनंजय मुंडे यांच्या वाढदिवसानिमित्त ( Dhananjay Munde birthday ) त्यांचे स्वीय सहायक प्रशांत जोशी यांनी एक अनोखी भेट दिली आहे. सामाजिक दायित्व निभावत मुंडे यांना दिलेल्या या भेटीबद्दल जोशी यांचे कौतुक करण्यात येत आहे.
प्रशांत जोशी यांना ‘कोरोना’ची लागण झाली होती. त्यातून ते बरेही झाले. पण राज्यात असे अनेकजण ‘कोरोना’बाधित रूग्ण आहेत. या रूग्णांच्या मदतीसाठी जोशी धावून आले आहेत.
जोशी यांनी रक्तदान करून अन्य ‘कोरोना’बाधित रूग्णांना प्लाझ्मा उपचारासाठी सहकार्य केले आहे. ‘ रक्तदान करून माझे साहेब धनंजय मुंडे यांना अनोखी भेट दिल्याचे’ जोशी यांनी ट्विट केले.
सर्वांच्या आशीर्वादाने कोरोनावर मी यशस्वीपणे मात केली. राज्यभर आजही माझे अनेक बांधव कोरोनाशी झुंज देत आहेत. त्यांचे स्वास्थ्य सुधारण्यासाठी माझा हातभार लागावा या सामाजिक जाणिवेतून मी आज प्लाझ्मा डोनेट करून माझे साहेब @dhananjay_munde यांना वाढदिवसाची अनोखी भेट दिली. 1/2 pic.twitter.com/3FO4a84gGQ
— prashant joshi (@prashantjoshi8) July 15, 2020
राज्याचे मुख्यमंत्री @CMOMaharashtra साहेब, उपमुख्यमंत्री @AjitPawarSpeaks दादा यांनी जनतेला रक्तदानाचे आणि प्लाझ्मा डोनेशनचे आवाहन केले आहे. या आवाहनाला प्रतिसाद देत मी प्लाझ्मा डोनेट केले. माझ्या इतर कोरोनामुक्त बांधवांनाही मी विनंती करतो की आपणही हे उदात्त कार्य करावे. 2/2 pic.twitter.com/ItyLEptJ8P
— prashant joshi (@prashantjoshi8) July 15, 2020
वाढदिवसालाही धनंजय मुंडे कामात
राज्याचे सामाजिक न्याय मंत्री धनंजय मुंडे यांनी कोरोनाच्या पार्श्वभूमीवर वाढदिवस साजरा न करण्याचा निर्णय घेतला होता. दिवसभर ते मंत्रालयातील कामातच व्यस्त होते.
पक्षातील नेतेमंडळी, मंत्रिमंडळातील सहकारी यांच्यासह राज्यभरातून त्यांच्या समर्थकांकडून मुंडे यांच्यावर शुभेच्छांचा वर्षाव होत होता.
धनंजय मुंडे यांनी मात्र वाढदिवस बाजूला सारून कामकाजाला प्राधान्य दिले. मुंडे यांनी मंत्रालयातील आपल्या दालनात उपस्थित राहून विभागातील अनेक महत्त्वाच्या कामांचा निपटारा केला.
धनंजय मुंडे यांच्या वाढदिवसानिमित्त बीड जिल्ह्यात अनेक ठिकाणी रक्तदान शिबिर आयोजित करून पदाधिकारी व समर्थकांनी ना. मुंडे यांचा वाढदिवस सत्कारणी लावला.
परळीसह अनेक ठिकाणी विविध सामाजिक उपक्रमही राबविण्यात आले.