सूर्यकुमार यादव आणि विराट कोहली यांचे अर्धशतक आणि दोघांमधील शतकी भागीदारीच्या जोरावर भारताने रविवारी तिसऱ्या आणि शेवटच्या टी20 आंतरराष्ट्रीय सामन्यात ऑस्ट्रेलियाचा सहा गडी राखून पराभव करून मालिका 2-1 अशी जिंकली. ऑस्ट्रेलियाच्या 187 धावांच्या लक्ष्याचा पाठलाग करताना भारताने सूर्यकुमार (36 चेंडूत 69, 5 षटकार, 5 चौकार) आणि कोहली (48 चेंडूत 63, 4 षटकार, 3 चौकार) यांच्यात तिसऱ्या विकेटसाठी 104 धावांची भागीदारी करून एक चेंडू शिल्लक असताना 187 धावा केल्या. हार्दिक पांड्यानेही नाबाद 25 धावांची खेळी केली. आणि तब्बल 9 वर्षांच्या प्रतिक्षेनंतर भारत ऑस्ट्रेलियाविरुद्धच्या मालिकेत विजय मिळवण्यात यशस्वी ठरला.
तत्पूर्वी, ऑस्ट्रेलियाने टीम डेव्हिड (27 चेंडूत 54 धावा, चार षटकार, दोन चौकार) आणि कॅमेरॉन ग्रीन (21 चेंडूत 52 धावा, सात चौकार, तीन षटकार) यांच्या अर्धशतकांच्या जोरावर सात बाद 186 धावा केल्या. डेव्हिडने डॅनियल सॅम्स (20 चेंडूत नाबाद 28, दोन षटकार, एक चौकार) सोबत सातव्या विकेटसाठी 68 धावा जोडून संघाला मजबूत धावसंख्येपर्यंत नेले. लक्ष्याचा पाठलाग करताना भारताने पहिल्याच षटकात लोकेश राहुलची (01) विकेट गमावली, ज्याचा यष्टिरक्षक मॅथ्यू वेडने सॅम्सच्या चेंडूवर चांगला झेल घेतला.
हे सुद्धा वाचा…
Maratha Kranti Morcha : ‘मराठे काही विरोधकांनी सोडलेली पिलावळ नाही’, मराठी क्रांती मोर्चा आक्रमक
Electric Vehicle : व्वा! इलेक्ट्रिक वाहन खरेदी केल्यावर वाचणार लाखो रुपये; वाचा कसं काय
Big Boss 16 : बिगबॉसचा पहिल्या स्पर्धकाला ओळखलंत का?
कर्णधार रोहित शर्माने (17) जोश हेजलवूडवर डावातील पहिला षटकार ठोकला. त्याने विरोधी संघाचा कर्णधार पॅट कमिन्सचे चौकार मारून स्वागत केले, पण त्याच षटकात षटकार मारण्याच्या प्रयत्नात तो सॅमच्या हाती झेलबाद झाला. त्यानंतर कोहली आणि सूर्यकुमार यांनी डाव पुढे नेला. सूर्यकुमारने कमिन्सवर चौकार मारून खाते उघडले तर कोहलीने हेझलवूडच्या सलग चेंडूवर षटकार आणि चौकार मारले. पॉवर प्लेमध्ये भारताने 2 बाद 50 धावा केल्या. सूर्यकुमारने ग्लेन मॅक्सवेलवर सलग दोन चौकार तर एक षटकारही ठोकला. सूर्यकुमारने 11व्या षटकात कमिन्सवर षटकार मारून भारताची धावसंख्या 100 धावांच्या पुढे नेली. झम्पावर लागोपाठ दोन षटकार मारत त्याने 29 चेंडूत अर्धशतक पूर्ण केले. सूर्यकुमारने हेझलवूडवर एक चौकार आणि एक षटकार ठोकला पण त्याच षटकात तो फिंचच्या हातून झेलबाद झाला.
शेवटच्या पाच षटकात भारताला विजयासाठी 44 धावांची गरज होती. ग्रीनच्या चेंडूवर कोहलीने37 चेंडूत अर्धशतक पूर्ण केले, पण या षटकात केवळ पाच धावा झाल्या. सॅम्सच्या पुढच्या षटकात फक्त सात धावा झाल्या. हार्दिक पांड्याने कमिन्सवर चौकार मारून दबाव कमी केला. भारताला शेवटच्या दोन षटकात 21 धावांची गरज होती. हार्दिकने 19व्या षटकात हेझलवूडच्या पहिल्याच चेंडूवर षटकार ठोकला. या षटकात 10 धावा झाल्या. शेवटच्या षटकात कोहलीने सॅम्सच्या पहिल्या चेंडूवर षटकार मारला पण पुढच्याच चेंडूवर फिंचच्या हाती झेलबाद केले. पंड्याने मात्र पाचव्या चेंडूवर चौकार मारून भारताला लक्ष्यापर्यंत नेले.
दरम्यान, या मालिका विजयानंतर भारतीय संघाचा आत्मविश्वास उंचावल्याचे पाहायला मिळत आहे. विशेष म्हणजे अवघ्या 2 दिवसांत म्हणजेच 28 सप्टेंबरपासून भारत आता दक्षिण आफ्रिकेविरुद्ध 3 टी20 सामन्यांची मालिका खेळणार आहे. या मालिकेत भारतीय संघ विजय मिळवून दक्षिण आफ्रिकेचा भारतात टी20 मालिकेतील कधीही पराभूत न होण्याचा विक्रम मोडीत काढण्याचा प्रयत्न करेल. विशेष म्हणजे केवळ 1 महिन्यांच्या अंतरावर असलेल्या टी20 विश्वचषकात आपल्या पर्ण क्षमतेने उतरण्यासाठी सध्या टीम इंडिया तयार असल्याचे दिसून येत आहे.