भाजप आमदार लक्ष्मण जगताप यांचे निधन; अजित पवार यांचे खास ते देवेंद्र फडणवीसांचे विश्वासू साथीदार!

पिंपरी-चिंचवड शहर भारतीय जनता पक्षाचे (BJP Pimpri Chinchwad) माजी अध्यक्ष आणि विद्यमान आमदार लक्ष्मण पांडुरंग जगताप ( Laxman Jagtap passed away) (५९) यांचे मंगळवारी सकाळी दीर्घ आजाराने निधन झाले. कर्करोगाशी त्यांची झुंज अखेर संपली असून बाणेर येथील ज्युपिटर रुग्णालयात (Jupiter Hospital Baner) त्यांनी अखेरचा श्वास घेतला. त्यांच्या पश्चात पत्नी अश्विनी, मुलगी ऐश्वर्या बंधू माजी नगरसेवक शंकर जगताप असा परिवार आहे. मागील ३५ वर्षे राजकीय क्षेत्रात त्यांनी आपल्या कर्तृत्वाचा ठसा उमटवला असून त्यांनी चार वेळा नगरसेवक पद आणि चार वेळा आमदारकी गाजवली आहे. राष्ट्रवादीचे नेते आणि विद्यमान विरोधी पक्ष नेते अजित पवार (Ajit Pawar) यांचे विश्वासू समजले जाणारे लक्ष्मण जगताप यांनी भाजपमध्ये प्रवेश केल्यानंतर उपमुख्यमंत्री देवेंद्र फडणवीस (Devendra Fadnavis) यांच्यादेखील ते गळ्यातील ताईत बनले. देवेंद्र फडणवीस यांचा विश्वास संपादन करण्यातही जगताप यांना यश आले असे त्यांचे व्यक्तिमत्व होते. त्यांच्या निधनाने राजकीय वर्तुळात शोककळा पसरली आहे.

राष्ट्रवादी काँग्रेसचे नेते अजित पवार यांचा बालेकिल्ला समजला जाणाऱ्या पिंपरी-चिंचवड या शहरात २०१७ साली भाजपाची एकहाती सत्ता आणण्यात लक्ष्मण जगताप यांनी महत्वाची कामगिरी बजावली होती. राजकीय क्षेत्रात त्यांनी आपल्या कर्तृत्वाने स्वतःचा ठसा उमटविला होता. मात्र मागील काही वर्षे त्याची प्रकृती खालावत गेली. त्यांना उपचारांसाठी ज्युपिटर रुग्णालयात दाखल करण्यात आले होते. प्रबळ इच्छा शक्तीच्या आधारे त्यांनी असाध्य आजाराशीदेखील कडवी झुंज दिली. पण काळाने डाव साधला आणि त्यांची प्राणज्योत मालवली.

 हे सुद्धा वाचा

‘मराठी तितुका मेळवावा’ मुंबईत मराठीचा डंका; वरळीत रंगणार विश्व मराठी संमेलन

ऑनलाईन गेमिंगमधील सट्टेबाजी, व्यसनाधीन करणारा तसेच लैंगिक कंटेटला बसणार चाप; केंद्र सरकारचे नवे धोरण लवकरच

मुंबई विद्यापीठाच्या विकासाला मुहुर्त सापडेना; एमएमआरडीएची चालढकल

राजकीय क्षेत्रातही लक्ष्मण जगताप यांनी त्यांच्या झुंजार बाण्याने बाहुबलींना मात दिली आहे. २००९ मध्ये त्यांनी शिवसेनेचे विद्यमान खासदार श्रीरंग बारणे यांना धूळ चारत विजयश्री खेचून आणली होती. २०१७ मध्ये पिंपरी-चिंचवड हा राष्ट्रवादी काँग्रेसचा बालेकिल्ला समजला जाणाऱ्या महापालिकेत त्यांनी भाजपचा झेंडा फडकावला. मात्र, त्यांच्या राजकीय वर्तुळातील एक्झिटने भाजपपुढे प्रश्नचिन्ह निर्माण केले आहे. राजकीय क्षेत्रातील अनेक दिग्गजांनी शोक व्यक्त केला आहे. लक्ष्मण जगताप यांनी अनेक प्रतिष्ठित संस्थामध्ये मनाची पदे भूषविली आहेत. न्यू मिलेनियम स्कुल, प्रतिभा कॉलेज ऑफ सायन्स अँड कॉमर्स, गणेश कॉ ऑप बँक आदी संस्थांचे ते संस्थापक होते. हरिद्वार येथील “पतंजली” संस्थेचे ते संस्थापक सदस्य होते. त्यांच्या निधनाने राजकीय क्षेत्रात पोकळी निर्माण झाली आहे.

आपला माणूस

राष्ट्रवादी काँग्रेस असो अथवा भारतीय जनता पक्ष सर्वांनाच लक्ष्मण जगताप हे “आपला माणूस” वाटत होते, असे त्यांचे मनमिळाऊ व्यक्तिमत्व होते. महाविकास आघाडी सरकार कोसळण्याआधी झालेल्या विधान परिषदेच्या निवडणुकीचा किस्सा अद्यापही अनेक राजकारण्याच्या लक्षात आहे. मतदानादरम्यान जगताप यांनी देवेंद्र फडणवीस यांना ‘मुख्यमंत्री साहेब’ म्हणून हाक मारताच उपस्थित मान्यवरांच्या भुवया उंचावल्या होत्या. आजारपणातही अजितदादांनीही जगताप यांना पक्षभेद विसरून सर्वतोपरी वैद्यकीय मदत देऊ केली होती.