अजित दादा, काय करून ठेवलंय तुम्ही हे. अहो, बारामतीचा अख्ख्या देशात नावलौकीक होता. विकास म्हणजे काय तर बारामती असं समीकरण आहे( Ajit Pawar distributes money in Baramati Rohit Pawar Allegation) पण दादा तुम्ही बारामतीचा बिहार बनवायचं ठरवलंल दिसतंय.
तुमच्या प्रचारसभेतील भाषणं आम्ही बारकाईनं ऐकली. तुम्हाला बारामतीचा विकास करायचाय म्हणून तुम्ही बेंबींच्या देठापासून बोंबलताय. पण हे सांगत असताना तुमच्या बोलण्यात नम्रता व विनयता दिसायला हवी. सगळ्या प्रचारसभांमधलं तुमचं बोलणं दमदाटीचं होतं. तुम्ही दादागिरीच्या भाषेत बोलत होता.
आता मतदानाच्या आदल्या दिवशी तुमच्या चेल्याचपाट्यांनी तर कहरच केलाय. अर्थात त्यांनी तुमच्या मार्गदर्शनाशिवाय असं केलं असल असं कसा म्हणता येईल. अहो रात्री १२ वाजेपर्यंत तुम्ही बँक उघडी ठेवलीय. रोहित पवार यांनी अगोदरच तुमच्यावर आरोप केला होता. तुमच्याकडून प्रत्येक मताला अडिच हजार ते पाच हजार रूपये वाटले जात आहेत, असा त्यांनी आरोप केला होता. तुम्ही अडिचशे कोटी रूपये मतदांना वाटणार आहात असंही त्यांनी म्हटलं होतं. हा राजकीय आरोप म्हणून रोहित पवारांच्या त्या वक्तव्याकडं पाहिलं गेलं. पण रोहित पवारांचा हा आरोप तुम्ही सिद्ध करून दाखवला. तुमचाच एक माणूस रंगेहात पकडला गेलाय. त्या गाडीत ५०० रूपयांच्या नोटा सापडल्या आहेत. तिथं पोलीस सुद्धा होते. त्याचा व्हिडीओ सगळीकडं व्हायरल झालायं. त्यात दिसतंय की, पोलिसांनी बघ्याची भूमिका घेतलीय. पोलीस ठोस कारवाई करताना दिसत नाहीत. बहुधा तुम्हाला घाबरून तुमच्या त्या माणसावर कारवाई करण्याची त्यांना हिंमत होत नसावी. हा सगळा प्रकार रोहित पवार मुद्दाम करीत आहेत, असा तुमच्याकडून प्रतिआरोप केला जातोय.