अभिनेता सलमान खानच्या (Salman Khan) घराबाहेर 14 एप्रिल 2023ला गोळीबार करण्यात आला होता. या गोळीबार प्रकरणातील आरोपीसंदर्भात महत्त्वाची बातमी समोर आली आहे. या प्रकरणातील आरोपी अनुज थापनने ( Anuj Thapan) पोलीस कोठडीत आत्महत्येचा (suicide) प्रयत्न केला. त्याला जीटी रुग्णालयात दाखल केल्यानंतर त्याचा मृत्यू झाल्याचे डॉक्टरांनी जाहीर केले. अभिनेता सलमान खानच्या वांद्रे येथील घरावर 14 एप्रिल 2023 ला गोळीबार झाला होता. गोळीबार करणाऱ्या दोन्ही आरोपींना पोलिसांनी गुजरात मधून अटक केली होती.(Salman Khan firing case: Anuj Thapan commits suicide )
दोन्ही आरोपींची परवानगी पोलीस कोठडीत करण्यात आली. दरम्यान या प्रकरणातील आरोपी अनुज थापनने पोलीस कोठडीत आत्महत्येचा प्रयत्न केला. त्याला तातडीने मुंबईच्या जीटी रुग्णालयात दाखल करण्यात आलं पण त्याचा मृत्यू झाला आहे. जीटी रुग्णालयातील डॉक्टरांनी त्याचा मृत्यू झाल्याचे सांगितले आहे. या बातमीनंतर एकच खळबळ उडाली आहे. अनुजने (वय – 32 वर्षे) सलमान खानच्या घराबाहेर गोळीबार करण्यासाठी शस्त्रे पुरवल्याचा आरोप आहे.अनुज थापनने आत्महत्या कशी केली याबाबत अद्याप कोणतीही माहिती समोर आलेली नाही.
,
सलमान खानच्या मुंबईतील घरावर 14 एप्रिल रोजी पहाटे पाचच्या सुमारास दोन आरोपींनी गोळीबार केला. त्यानंतर हे दोघे गुजरातला गेले. तिथून पोलिसांनी त्यांना अटक केली होती. विकास गुप्ता व सागर पाल अशी गोळीबार करणाऱ्या आरोपींची नावं होती. या गोळीबारासाठी त्यांनी चार लाख रुपये घेतले होते. पोलिसांनी सुरतजवळ तापी नदीतून गोळीबारासाठी वापरलेल्या बंदुका जप्त केल्या होत्या. अशातच आता आरोपी अनुजने आत्महत्या केल्याची माहिती समोर आली आहे. मुंबईतील आझाद मैदान पोलीस स्टेशनमध्ये यासंदर्भात ADR दाखल करण्याच आल्याची माहिती मिळाली आहे.
पोलीस या आत्महत्येसंदर्भात अधिक चौकशी करत आहेत. सलमान खानच्या घराबाहेर झालेल्या गोळीबाराची जबाबदारी लॉरेन्स बिष्णोईचा भाऊ अनमोलने सोशल मीडियाच्या माध्यमातून स्वीकारली होती. या प्रकरणात विकी गुप्ता, सागर पाल आणि अनुज थापन यांना पोलिसांनी अटक केली होती. सलमान खानने हम साथ साथ है चित्रपटाच्या शूटींग दरम्यान काळवीटांची शिकार केली होती. तेव्हापासून बिष्णोई समाजाचा सलमान खानवर राग आहे. सलमान खानला लॉरेन्स बिष्णोईकडून जीवे मारण्याच्या धमक्या देण्यात आल्या आहेत. सलमानच्या घराबाहेर गोळीबार झाल्यानंतर त्याच्या कुटुंबियांना आणि त्याच्या चाहत्यांना धक्का बसला होता. सलमान खानचा भाऊ अरबाज खानने संपूर्ण कुटुंबाला या घटनेमुळे धक्का बसल्याचे सांगितले होते. या घटनेनंतर मुख्यमंत्री एकनाथ शिंदे यांनीदेखील सलमान खानची भेट घेत या प्रकरणातील आरोपींना कठोर शिक्षा देणार, असे सांगितले होते.