टीम लय भारी
मुंबई : निसर्ग चक्रीवादळामुळे कोकणातील सिंधुदुर्ग, रत्नागिरी व रायगड जिल्ह्यात अतोनात नुकसान झाले आहे. राष्ट्रवादीचे अध्यक्ष शरद पवार यांनी घटनास्थळी जाऊन पाहणी केली. त्यांच्या या दौ-यानंतर आता भाजपचे विरोधी पक्ष नेते देवेंद्र फडणवीस (Devendra Fadnavis) हे सुद्धा कोकण दौ-यावर निघणार आहेत.
देवेंद्र फडणवीस हे उद्या (शुक्रवार) कोकण दौ-यावर जाणार असून चक्रीवादळामुळे नुकसान झालेल्या भागाची पाहणी करणार आहेत. त्यांचा हा दोन दिवसांचा दौरा असणार आहे. या आधी भाजप नेते प्रवीण दरेकर यांनी कोकण, रायगड परिसरात निसर्ग चक्रीवादळामुळे झालेल्या नुकसानाची पाहणी केली होती.
शरद पवार यांच्या कोकण दौ-यावर भाजपचे प्रदेशाध्यक्ष चंद्रकांत पाटील यांनी टीका केली होती. त्यांच्या या टीकेमुळे राजकीय वातावरण पेटले होते. चंद्रकांत पाटील यांच्या टीकेला राष्ट्रवादीचे नेते आणि राज्याचे गृहनिर्माण मंत्री जितेंद्र आव्हाड यांनी उत्तर दिले होते.