टीम लय भारी
मुंबई : भाजपचे आमदार गोपीचंद पडळकर यांना सन्मान देणारे नगरसेवक लक्ष्मण ऊर्फ टीमू एडके यांची राष्ट्रवादी काँग्रेसने हकालपट्टी केली आहे ( NCP corporator suspended by party, who felicitated to Gopichand Padalkar ). एडके यांनी पडळकर यांचा सन्मान केल्याची बातमी सर्वप्रथम ‘लय भारी’नेच प्रसिद्ध केली होती.
गोपीचंद पडळकर यांनी शरद पवार यांच्याबद्दल वादग्रस्त वक्तव्य केल्यामुळे राष्ट्रवादी काँग्रेसमध्ये प्रचंड रोष आहे. राष्ट्रवादीचे पदाधिकारी, कार्यकर्ते पडळकर यांच्या विरोधात राज्यभरात आंदोलने करीत आहेत. पडळकर यांना घराबाहेर फिरू देणार नाही, असे इशारेही राष्ट्रवादीकडून देण्यात येत आहेत.
राष्ट्रवादीमध्ये पडळकरांविरोधात आग धुमसत आहे. परंतु राष्ट्रवादीचेच नगरसेवक लक्ष्मण ऊर्फ टीमू एडके यांनी पडळकर यांना चक्क सन्मानाची वागणूक दिली. पडळकर यांना स्वतःच्या घरी ते घेऊन गेले. पडळकरांचा त्यांनी सत्कारही केला. ही बातमी सर्वप्रथम ‘लय भारी’नेच प्रसिद्ध केली होती.
एडके यांनी पक्षशिस्तीचा भंग केलाच. परंतु वादग्रस्त वक्तव्य केलेल्या पडळकर यांना सन्मानही दिला. त्यामुळे राष्ट्रवादी काँग्रेसने या प्रकाराची गंभीर दखल घेत एडके यांना सहा वर्षांसाठी पक्षातून निलंबीत केले आहे. राष्ट्रवादी काँग्रेसचे सांगली जिल्हाध्यक्ष अविनाश पाटील यांनी ही कारवाई केली.