टीम लय भारी
मुंबई : वंचित बहुजन आघाडीमधून बाहेर पडलेल्या नेत्यांनी राष्ट्रवादी काँग्रेसमध्ये प्रवेश केल्याची घोषणा पक्षाने केली आहे. परंतु धनगर व मुस्लिम आरक्षणाला शरद पवारांनी कोणतेही ठाम आश्वासन दिलेले नाही. त्यामुळे आम्ही राष्ट्रवादी काँग्रेसमध्ये प्रवेश केला नसल्याचे स्पष्टीकरण या नेत्यांनी दिले आहे. आम्ही प्रवेश केलेला नसतानाही राष्ट्रवादी काँग्रेसने प्रसिद्धीपत्रक काढून आमच्या प्रवेशाच्या खोट्या बातम्या पसरविल्याचा आरोपही या नेत्यांनी केला आहे.
वंचितमधून बाहेर पडलेले माजी आमदार हरिदास भदे, बळीराम शिरसकर, नवनाथ पडळकर, अर्जून सलगर आदी 150 पदाधिकारी व कार्यकर्त्यांची शरद पवार यांच्यासोबत तीन दिवसांपूर्वी मुंबईत बैठक पार पडली. यावेळी राष्ट्रवादीचे प्रदेशाध्यक्ष जयंत पाटील, छगन भुजबळ हे नेतेही उपस्थित होते. या बैठकीत वंचितमधून बाहेर पडलेल्या नेत्यांच्या वतीने पडळकर यांनी शरद पवार यांच्यासमोर 12 कलमी राजकीय व सामाजिक मुद्दे मांडले. या मुद्द्यांवर पवार सकारात्मक असतील तर प्रवेश करू अशी भूमिका या नेत्यांची होती. त्यावर पवार यांनी या नेत्यांचे समाधान करण्याचा प्रयत्न केला. परंतु इतर मागासवर्गीयांची जनगणना तामिळनाडूच्या धर्तीवर करावी, धनगर समाजाला एसटी आरक्षण लागू करावे, मुस्लीम समाजाला आरक्षण द्यावे या मागण्यांना पवार यांनी बगल दिली. त्यामुळे आमचे समाधान झाले नाही. म्हणून राष्ट्रवादी काँग्रेसमध्ये प्रवेश करण्याचा कोणताही निर्णय झाला नाही. पण त्या अगोदरच राष्ट्रवादी काँग्रेस पक्षाने प्रसिद्धीपत्रक काढून आम्ही राष्ट्रवादीत प्रवेश केल्याच्या खोट्या बातम्या पसरविल्या. या प्रकारामुळे राष्ट्रवादी काँग्रेससोबत पुढील चर्चा करण्यात अडथळे निर्माण झाल्याचे नवनाथ पडळकर यांनी ‘लय भारी’शी बोलताना सांगितले.
माजी आमदार हरिभाऊ बधे व अर्जुन सलगर यांनी वंचित बहुजन आघाडीतून आज मुंबई येथे राष्ट्रवादी काँग्रेस पक्षात प्रवेश केला. राज्यातील वंचित समाजाला न्याय देण्याच्या दृष्टीने त्यांच्या या भूमिकेचे स्वागत आहे. pic.twitter.com/9n4wl0FoOH
— Sharad Pawar (@PawarSpeaks) March 8, 2020
धनगर समाजाच्या आरक्षणासाठी एक शिष्टमंडळ केंद्रात घेऊन गेलो होतो. त्यांच्याकडून स्पष्ट शब्दात याला नकार देण्यात आला. त्यांचे उत्तर आले की उत्तरेकडील काही राज्यात हे आरक्षण दिल्याने नाराजी निर्माण होईल. त्यामुळे हे होणं शक्य नाही असे सांगितले.
— Sharad Pawar (@PawarSpeaks) March 8, 2020
दरम्यान, माजी आमदार हरिदास भदे यांनीही पत्रक जारी केले आहे. आमची शरद पवार यांच्यासोबत बैठक झाली. परंतु आम्ही राष्ट्रवादी काँग्रेसमध्ये प्रवेश केलेला नाही. सर्व सहकाऱ्यांशी चर्चा करूनच प्रवेशाचा निर्णय घेतला जाईल, असे भदे यांनी या पत्रात नमूद केले आहे.
हे सुद्धा वाचा
ज्योतिरादित्य शिंदे भाजपच्या मार्गावर, नरेंद्र मोदींची घेतली भेट
खासदार सुप्रिया सुळे, मंत्री दत्तात्रय भरणेंनी धनगर समाजाच्या आंदोलकांशी साधला संवाद