टीम लय भारी
मुंबई : अत्यंत कार्यक्षम, मनमिळाऊ व सामान्य लोकांसाठी सतत तत्पर अशी नगरविकास मंत्री एकनाथ शिंदे यांची प्रतिमा आहे. पण त्यांच्या कार्यालयातील खासगी सचिव व अन्य अधिकारी कुचकामी आहेत. बिनकामाच्या या अधिकाऱ्यांमुळे शिंदे यांना आपल्या खात्यावर अजून पकड घेता आलेली नाही.
नगर विकास विभागातील अधिकारी सुद्धा मंत्री कार्यालयावर कमालीचे नाराज आहेत. नगरविकासातील ज्ञान असलेला एका सुद्धा प्रभावी अधिकारी शिंदे यांच्या कार्यालयात नाही. त्यामुळे महत्वाच्या फाईली घेऊन विभागातील अधिकारी मंत्री कार्यालयात येतात, तेव्हा कुणाशी चर्चा करायची असा गहन प्रश्न या विभागाच्या अधिकाऱ्यांना सतावत असतो. खासगी सचिव दिलीप ढोले यांना नगरविकास विभागाचे ज्ञान नाहीच, पण विभाग समजून घेण्यासाठी सुद्धा ते काहीच प्रयत्न करीत नाहीत. ढोले यांना प्रशासकीय कामांपेक्षा ‘अर्थपूर्ण’ कामांतच जास्त रस असल्याचे सूत्रांनी सांगितले.
मागील सरकारमध्ये नगरविकास राज्यमंत्री रणजीत पाटील यांच्याकडे कसलेले अधिकारी होते. त्यामुळे रणजित पाटील यांच्या कार्यालयाने प्रभावी काम केले होते. प्रशासकीय कामात तरबेज असलेले अधिकारी मंत्री कार्यलयात नेमा, असेही नगरविकासमधील अधिकाऱ्यांनी एकनाथ शिंदे यांना सुचविले आहे.
नगरविकास विभागाचे ज्ञान असलेले अधिकारी घेण्याची एकनाथ शिंदे यांची सुद्धा मानसिकता झाली आहे. त्यामुळे ढोले यांना खासगी सचिव पदावरून लवकरच नारळ मिळणार असल्याचे सूत्रांनी सांगितले. ढोले यांच्याबाबत बऱ्याच तक्रारी आहेत. दालनात एकटेच असताना भेटायला आलेल्या लोकांना ताटकळत बाहेर उभे करतात. सामान्य लोकांशी ते उद्धट वागतात. त्यांचे म्हणणे ऐकून घेण्याचे साधे सौजन्यही ते दाखवत नाहीत. भेटायला आलेल्या लोकांसाठी ढोले यांच्याकडे कसलाच वेळ नसतो, पण अर्थपूर्ण कामासाठी येणाऱ्या पंटरना ते भरपूर वेळ देतात. ढोले यांनी इंदापूरला काही ‘संस्थाने’ स्थापन केली आहेत. मंत्री कार्यालयात राहून ते आपल्या खासगी संस्थांनांच्या हिताची कामे करीत असतात, अशाही तक्रारी आहेत. ढोले यांच्या या कार्यपद्धतीमुळे शिंदे यांचीही प्रतिमा मलीन व्हायची वेळ आली आहे. त्यामुळे शिंदे यांनी सुद्धा सावधगिरी बाळगली आहे. एवढेच नव्हे तर, ढोले यांना खासगी सचिव पदावर नियुक्ती करण्याबाबत आदेशही जारी झालेले नाहीत. अनधिकृतरित्या त्यांनी खासगी सचिव पदाच्या खूर्चीत बस्तान मारले आहे.
मंत्री कार्यालयाची अशी केविलवाणी स्थिती आहे. त्यामुळे ढोले व अन्य अधिकाऱ्यांना घरचा रस्ता दाखवून त्या ऐवजी नगरविकास विभागातील उत्तम ज्ञान असलेले कार्यक्षम अधिकारी नेमण्याचा तत्वतः निर्णय एकनाथ शिंदे यांनी घेतला असल्याचे सूत्रांनी सांगितले.
हे सुद्धा वाचा
छगन भुजबळांच्या ओएसडीने महिलेला कार्यालयाबाहेर हाकलले, महिलेने घातला गोंधळ !